Idetë e mëposhtme janë sugjerime të kujdesdhënësve dhe fëmijëve të cilat i praktikojnë në familje sëbashku gjatë ditëve të verës.
Në një botë ku teknologjia dhe ritmi i shpejtë i jetës shpesh e largojnë vëmendjen tonë nga ato që kanë vërtet rëndësi, kalimi i kohës cilësore me fëmijët është më i rëndësishëm se kurrë. Për fëmijët, koha e kaluar me prindërit është një burim i pashtershëm dashurie, sigurie dhe zhvillimi. Në këtë udhëzues, do të gjeni ide praktike për aktivitete që mund të realizohen në natyrë dhe në shtëpi, për ta bërë periudhën e verës më të bukur për të gjithë familjen.
Në natyrë!
Nuk ka rëndësi nëse keni dalë për një shëtitje nga liqeni apo jeni në plazh, mund ti angazhoni fëmijët apo gjithë familjen me një lojë të thjeshtë “Koleksioni i këtij viti”
Disa ide për koleksione:
Për moshën 3-8 vjeç, koleksionet e guckave, gjetheve dhe gureçëve në forma dhe ngjyra të ndryshme mund të jenë shumë argëtuese.
Për moshën 8- 12 vjeç, koleksionet si pendë zogjsh, gjurmë kafshësh apo bimë të ndryshme mund të jenë ide që zgjojnë kureshtje. Për shembull; krijimi i albumit të pendëve duke përfshirë dhe një info të shkurtër për çdo pendë)
Mbi 13 vjeç, kjo është një moshë pak e vështirë për të ndezur interes tek koleksionet por duke përdorur mjete si telefoni apo edhe një aparat fotografik mund të ju duket edhe me interesante moshës së tyre. Tematika që mund të përdoren për të qënë në të njëjtën linjë me çfarë fëmija pëlqen:
- Fotografi/ video/ Reels Pushimet Verore – tashmë ju e keni dikë që do kujdeset për të kapur cdo moment të pushimeve.
- Peisazhet apo vendet që vizitojmë gjatë verës
- Veshjet më stil të sezonit.
Kështu fëmijët mund të zbulojnë edhe pasione të reja. Mund ti shtyni edhe më tej duke ju kërkuar një video përmbledhëse, mund të habiteni me atë çka ata dinë të bëjnë sot me ndihmën e teknologjisë.
Në shtëpi!
Mbrëmjet mund të jenë akoma më argëtuese. Ju mund të krijoni një traditë të re në familjen tuaj!
- Mbrëmje për puzzle. Kur e keni bërë këtë lojë për herë të fundit? Eshtë koha ti riktheheni sërish. Kjo lojë është argëtuese për të gjithë familjen.
- Lojra të tavolinës. Nga luddo, shah, UNO mund të gjenden lehtësisht për të gjitha moshat dhe janë argëtuese. Kështu ju mund të ju mësoni atyre një lojë të re dhe pse jo dhe ata ju.
- Nata e kinemasë në shtëpi. Një mënyrë për të njohur cfarë shohin sot fëmijët dhe pse jo dhe ata të zbulojnë dicka nga ju. Tregoni të duruar dhe lërëni fëmijët të zgjedhin lirisht, qofshin këto filma të animuar ose dhe filma të zhanreve të ndryshme.
- Gatuajme sëbashku. Le të mësojmë një recetë të re! Kush tha që duhet të jëtë e komplikuar mund të fillojmë nga përgatija e një lëmonde deri tek përgatitja e një keku. Kjo ide përvec se me shumë benefite për fëmijët që mësojnë dhe kalojnë kohë më ju, është edhe e shijshme.
- Mbjellim lule. Sa bukur është të kalosh kohë duke punuar për dicka kaq të bukur sa lulet. Për këtë aktivitet duhet të përshtasni lulet me sezonin.
Eksperimentet mund të jenë shumë argëtuese!
Këtu janë disa ide sesi mund të përfshiheni të gjithë si familje apo mund të angazhoni fëmijët me njëri tjetrin.
Riciklojmë – Një kavanoz i përdorur mund të kthehet lehtësisht në një vazo lulesh
Vullkani në Miniaturë! Materialet: uthull, sodë buke, ngjyrë ushqimore, një gotë plastike. Eksperimenti: Mbushni gotën plastike me sodë buke dhe shtoni pak ngjyrë ushqimore. Pastaj shtoni uthull dhe shikoni “shpërthimin” e vullkanit tuaj të vogël.
Ngjyra Që Ndryshojnë! Materialet: lëng limoni, letër e bardhë, furçë e vogël, hekur për rrobash. Eksperimenti: Shkruani ose vizatoni diçka në letër me lëng limoni dhe lëreni të thahet. Pasi të thahet, ngrohni letrën me hekur dhe shikoni se si shfaqet mesazhi juaj i fshehtë.
Ujë dhe Vaj! Materialet: një gotë e madhe, ujë, vaj vegjetal, ngjyrë ushqimore. Eksperimenti: Mbushni gjysmën e gotës me ujë dhe shtoni disa pika ngjyrë ushqimore. Pastaj, shtoni vajin dhe shikoni si uji dhe vaji nuk përzihen.
Kristalet e Kripës! Materialet: ujë i nxehtë, kripë, një kavanoz, një laps, një fill, një letër. Eksperimenti: Tretni sa më shumë kripë që mundeni në ujë të nxehtë. Lidhni një fill në një laps dhe vendosni lapsin mbi grykën e kavanozit me fillin që preket në ujë. Lëreni për disa ditë dhe shikoni kristalet që formohen.
Lumi i Qumështit! Materialet: një pjatë e cekët, qumësht, ngjyrë ushqimore, detergjent për enë. Eksperimenti: Mbushni pjatën me qumësht. Shtoni disa pika ngjyrë ushqimore në qumësht. Shtoni pak detergjent për enë dhe shikoni si ngjyrat fillojnë të lëvizin dhe të përzihen.
