Sara e pëlqen shumë lëndën e matematikës dhe gjuhës angleze. Pasditeve të qeta, Sara del jashtë në oborr për të bërë atë që i pëlqen më shumë, për të mësuar. Me një copë shkumës në dorë, Sara shkruan në derën e vjetër të oborrit ushtrimet e saj të matematikës dhe punon për të gjetur zgjidhjet. “Ndonjëherë unë dhe motra ime luajmë sikur jemi në shkollë. Njëra prej nesh sillet si mësuesi dhe tjetra nxënësi,” tregon Sara. Pasi zgjidh problemet e matematikës, ajo pastron derën me leckë që të mund ta përdorë sërish nesër.
Ndërtimi i një të nesërme më të mirë për Sarën dhe familjen e saj
Sara jeton me motrën e saj më të madhe dhe prindërit e saj në një shtëpi të vogël, në një rrethinë të Tiranës. Babai i saj nuk është në gjendje të punojë për shkak të prapambetjes mendore dhe fizike dhe nëna e saj lufton çdo ditë për të siguruar ushqim për shtëpinë e tyre. “Bej punë të vogla sa për të marrë ndonjë të ardhur. Nuk e lë dot shtëpinë shumë gjatë pa njeri sepse edhe burri ka nevojë për kujdes,” tregon ajo.
Pavarësisht sfidave, Sara ka një etje të madhe për dije. Ajo e ka shkollën pak larg nga shtëpia dhe nëna e tyre kujdeset që ato të shkojnë çdo ditë duke i shoqëruar në këmbë. Pavarësisht dëshirës së vajzës dhe ecurisë së saj të mirë në shkollë, nëna e kishte të vështirë të siguronte pajisje të tjera shkollore përveç librave të shkollës që merrte nga miqtë ose nga shkolla. Pavarësisht gjithë arritjeve akademike, Sara dhe motra e saj ishin të tërhequra, fjalë pak dhe nuk ndërvepronin shumë më fëmijë të tjerë. Sipas ekspertëve këto ndryshime vijnë në varësi të faktorëve të ndryshëm si ambjenti, mjedisi familjar, arsimi, dhe përvojat personale e fëmijës.
Pas kontaktit me punonjësit social të Organizatës të SOS Fshatrat e Fëmijëve në Shqipëri familja e Sarës u bë pjesë e projektit për Fuqizimin e Familjes që ka për qëllim parandalimin e braktisjes së fëmijëve dhe ndarjen e familjes.
Falë mbështetjes këtë vit, Sara ashtu siç edhe 300 fëmijë të tjerë që suportohen nga ky projekt në Tiranë, morën materiale të reja studimi dhe seanca mbështetëse në edukim për t’i ndihmuar ata të zhvillohen dhe të lulëzojnë në shkollë. Sara dhe motra e saj u mbështetën me ekspertë të fushës sipas nevojës për ti ndihmuar në kapërcimin e vështirësive dhe zhvillmin e mëtejshëm kognitiv, emocional dhe social. Nënës ju ofrua mbështetje me trajnim për ngritjen e kapaciteteve dhe suport për të përmirësuar kushtet e tyre të jetesës dhe për t’u siguruar që fëmijët të rriten dhe të zhvillohen në mënyrë të shëndetshme.
Pjesëmarrja në aktivitete krijuese dhe argëtuese gjatë këtij viti e ka ndihmuar Sarën dhe motrën e saj të socializohen me fëmijët e tjerë dhe të shijojë fëmiijërinë e saj mes lojrave dhe momenteve të bukura.
